"ދަނބުމާ" ފޮންޓު ރަމްޒުކޮށްދެނީ އަޅުގަނޑުމެންގެ ލޮބުވެތި ބައްޕަ އަލްމަރުޙޫމް މުޙައްމަދު ފާއިޒް (ދަނބުމާ ފާއިޒު) ގެ އަތުލިޔުމެވެ. 

ބައްޕަ އަމިއްލަ އަތުން ލިޔުއްވާފައިވާ ރެސިޕީ ފޮތް، ބައްޕަގެ ދުނިޔޭގައި އަޅުގަނޑުމެންނާ ހަވާލުކުރައްވާފައި ވެއެވެ.  ހުރިހާ ކުދިން އެފޮތުގެ ކޮޕީއެއް ހެދުމަށް އެދިލެއްވިއެވެ. މި ދެންނެވި ފޮތުގައި ބައްޕަގެ އަމިއްލަ ރެސިޕީތަކާއި ކުރީގެ މަޝްހޫރު ރެސިޕީތައް (ރެސިޕީ ކިޔައިދެއްވި ބޭފުޅުންގެ ރިފަރަންސްއާ އެކު) އަދި ވަކި ފަރާތަކާ ޙަވާލާނުދީ ހުރި ރެސިޕީތައް ވެސް ހިމެނެއެވެ.

ބައްޕަގެ ރެސިޕީ ފޮތެއް ތައްޔާރުކުރުމުގެ ޚިޔާލު އުފަންވީ އެހިސާބުންނެވެ. ބައްޕަގެ ރީތި އަތުލިޔުއްވުމުން ލިޔުއްވާފައިވާ އޮތް ފޮތް އަޅުގަނޑުމެން ބެލީ އެ އޮތްގޮތަށް ސްކޭން ކޮށްގެން ޗާޕުކުރެވޭ ތޯއެވެ. އެއީ ބައްޕަގެ ލިޔުން ރީތިކަމުންނެވެ. ދެފުށުގައި ލިޔުއްވާފައި ހުރުމުން، ފޮތުގެ ގަނޑުތައް ތުނިކަމުން އެކަން އެގޮތަށް ނުކުރެވުނެވެ. އަޅުގަނޑުމެން ދެން ވިސްނީ "ލޫޕްކުރާފްޓް" އާ ވާހަކަދައްކައިގެން ބައްޕަގެ އަތުލިޔުން ރަމްޒުކޮށްދޭ ފޮންޓެއް ހެދުމަށްފަހު، މިފޮތް ޝާޢިއުކުރާށެވެ.

ބައްޕަ އެދިލައްވާފައިވަނީ މިފޮތުން އެއްވެސް މާލީ މަންފާއެއް ބައްޕަގެ އެއްވެސް ކުއްޖަކު ނުހޯދުމަށެވެ. ނަމަވެސް ފޮތް ޗާޕުކޮށްގެން ވިއްކަނީ ނަމަ، އެ ލިބޭ ފައިދާއެއް ޞަދަޤާތްކުރަން ބައްޕަ އެދިލެއްވިއެވެ. 

ބައްޕަގެ ރީތިކޮށް ލިޔުމުގެ މި ޝައުގާއެކު އެކިއެކި ލިޔުންތައް ނަކަލުކޮށް ބައްޕަ އަމިއްލައަށް ލިޔުއްވާފައި އެތަކެއް ލިޔުންތައް ހުރިއިރު އެންމެ އިސްކަމެއް ދެއްވާފައިވަނީ "ދީނީ" ލިޔުން ނަކަލު ކުރެއްވުމަށެވެ.

އަޅުގަނޑުމެންގެ ބައްޕަ މި ދުނިޔެ ދޫކުރެއްވި އިރު އަނބިކަނބަލެއްގެ ގޮތުގައި އިންނެވި ޢިނާޔާ އަޙްމަދު ފާހަގަ ކުރާ ގޮތުގައި ކޮންމެ ދުވަހަކު ވެސް ކޮންމެވެސް ވަގުތެއް ބައްޕަ އެއްޗެއް ލިޔުއްވުމުގައި ހޭދަކުރައްވައެވެ. ނަމަވެސް އަޅުގަނޑުމެން 23 ކުދިންގެ ތެރެއިން އަޅުގަނޑުމެންގެ އެންމެ ހަގު ކޮއްކޮ، ޢަބްދުލް މުހީތު ("ބޮބީ") ނިޔާވުމަށްފަހު، ބައްޕަގެ ދިރިއުޅުމަށް އައި ހިތާމައާއި މޮޅިވެރިކަމުގެ ސަބަބުން، ބައްޕަ ވަރަށް ބޮޑަށް މާޔޫސްވެ ބަލިވެ، މި ފަންނާ ދުރުހެލިވިއެވެ.

ލޫޕްކްރާފްޓްގެ "ރާއްޖެޓައިޕް"ގެ މަސައްކަތް އޮންލައިން ޕްލެޓްފޯރމްތަކުން ފެނުމުން ލޫޕްކްރާފްޓްއާއި ބައްދަލުކޮށް ބައްޕަގެ އަތުލިޔުން ހިއްސާކުރީމެވެ. ލޫޕްކްރާފްޓުން އަޅުގަނޑުމެންގެ މި މަސައްކަތް ކުރިއަށް ގެންދިއުމުގެ ޝައުޤުވެރިކަން ފައުޅުކުރިއެވެ. "ދަނބުމާ" ފޮންޓު ވުޖޫދު ކުރެވޭއިރު އަޅުގަނޑުމެންގެ ލޯބިވާ ބައްޕަ ވަނީ މި ދުނިޔެ ދޫކުރައްވާފައެވެ. އަދި މި ޚިޔާލު ބައްޕައާއި ހިއްސާކުރެވޭ ގޮތެއްވެސް ވެފައެއް ނެތެވެ.  އެހެންނަމަވެސް ބައްޕަގެ މި ޝައުޤުގެ ހަނދާން އައު ކުރުމަށްޓަކައި "ލޫޕްކްރާފްޓް" އިން ކޮށްދެއްވި ފުރިހަމަ އަގުހުރި މަސައްކަތް ޝުކުރުވެރިކަމާ އެކު ޢާއިލާއިން ފާހަގަކުރަމެވެ. އަދި "ލޫޕްކްރާފްޓް"ގެ އެހީއާއެކު ބައްޕަގެ މި ހުވަފެނުގައި ކުލަޖައްސާލަދެވޭތޯ އަޅުގަނޑުމެން މި ދަނީ މަސައްކަތް ކުރަމުންނެވެ.

"ލޫޕްކްރާފްޓް" އިން ފަރުމާކޮށްދެއްވާފައިވާ މި ހިތްގައިމު ފޮންޓް ބޭނުންކޮށްގެން، ބައްޕަގެ ކައްކާފޮތެއް މާތްﷲގެ އިރާދަފުޅާއެކު ކިޔުންތެރިންނާއި ހަމައަށް ގެނެސްދޭނަމެވެ. "ދަނބުމާ" ފޮންޓް މި ތަޚުޞީސް ކުރަނީ އަޅުގަނޑުމެންގެ ލޯބިވާ ބައްޕަ ދަނބުމާ ފާއިޒަށެވެ. އަދި އަޅުގަނޑުމެންގެ ލޯބިވާ ކޮއްކޮ ޢަބްދުލް މުހީތު (ބޮބީ)ގެ ހަނދާން އާކުރުމުގެ ގޮތުން މި ފޮންޓު ލޯންޗުކުރެވިގެން މި ދަނީ ބޮބީގެ އުފަންދުވަހު (10 އޮގަސްޓު 2025) ގައެވެ. 

ބައްޕައާއި ބޮބީއަށް ސުވަރުގޭގެ ދާއިމީ ނިޢުމަތް މިންވަރު ކުރައްވާށިއެވެ. އާމީން.

- ދަނބުމާ ފެމިލީ